KURS ISHI

KIRISH Sayyoramizning ekologik barqarorligini ta'minlashda o'rmonlar muhim o'rin tutadi. Ular nafaqat biologik xilma-xillikni saqlovchi markazlar, balki iqlimni tartibga soluvchi, tuproq eroziyasining oldini oluvchi va inson faoliyati uchun zarur resurslarni ta'minlovchi tabiiy tizimlardir. O'zbekiston Respublikasi Vazirlar Mahkamasining 2020-yil 24-avgustdagi "O'rmon xo'jaligi davlat qo'mitasi faoliyatini takomillashtirish chora-tadbirlari to'g'risida"gi 504-son qarori o'rmon fondining saqlanishi va samarali boshqaruvi masalalariga davlat darajasida alohida e'tibor qaratilayotganligini ko'rsatadi. Biroq, antropogen ta'sirlar, iqlim o'zgarishlari va tabiiy resurslardan noto'g'ri foydalanish oqibatida o'rmon ekosistemalarining degradatsiyasi, biologik xilma-xillikning qisqarishi hamda endemik turlarning yo'qolib ketish xavfi tobora ortib bormoqda. Shu bois, o'rmonlarni har tomonlama o'rganish, ularning dendralogik tarkibi va hayvonot dunyosi holatini tahlil qilish zamon talabidir. Andijon viloyati Sharqiy Farg'ona vodiysining shimoli-sharqiy qismida joylashgan bo'lib, mintaqaning o'rmonlari o'ziga xos ekologik xususiyatlarga ega. Bu hududdagi o'rmon ekosistemalari nafaqat viloyatning, balki butun mintaqaning tabiiy muvozanatini saqlashda muhim rol o'ynaydi. Biroq, irrigatsiya tizimlarining kengayishi, aholi zichligining ortishi va qishloq xo'jaligi maydonlarining kengayishi kabi omillar bu o'rmonlarga salbiy ta'sir ko'rsatmoqda. Ayniqsa, o'rmon fondining doimiy ravishda monitoring qilinmasligi, invaziv turlar ta'sirining yetarli darajada o'rganilmaganligi va mahalliy populyatsiyalarning holati bo'yicha aniq ma'lumotlarning yo'qligi ushbu muammolarni yanada murakkablashtiradi. Bu holat Andijon viloyati o'rmonlarining dendralogik tarkibi va hayvonot dunyosining hozirgi holatini chuqur ilmiy tahlil qilishni, ularni muhofaza qilish bo'yicha samarali strategiyalar ishlab chiqishni dolzarb vazifaga aylantiradi. O'rmon dendralogiyasi va hayvonot dunyosini o'rganish bo'yicha turli tadqiqotlar olib borilgan. Jumladan, R. Abdullayev o'z ishlarida O'zbekiston florasining asosiy turlarini atroflicha tahlil qilgan [1]. N.N. Azimov O'zbekiston o'rmonlarining biologik xilma-xilligi masalasini ko'rib chiqqan bo'lsa [2], Sh.T. Alimov o'rmon ekologiyasi va uni muhofaza qilish bo'yicha fundamental asar yaratgan [3]. N.I. Islamov dendralogiya asoslarini yoritib bergan [4], H. ...