KURS ISHI

KIRISH Davlat krediti va davlat qarzini boshqarish bugungi kunda har qanday milliy iqtisodiyot uchun muhim ahamiyat kasb etadi. Mamlakatning moliyaviy barqarorligini ta'minlash, iqtisodiy o'sishni qo'llab-quvvatlash hamda aholining turmush darajasini oshirishda davlatning qarz siyosati markaziy o'rin tutadi. Davlatning vaqtincha erkin pul mablag'larini jalb qilish hamda to'lov muddatida ushbu mablag'larni foizlari bilan qaytarish bo'yicha majburiyatlari sifatida ta'riflanuvchi davlat qarzi iqtisodiy rivojlanish uchun qo'shimcha resurslar manbai bo'lishi mumkin, shu bilan birga, noto'g'ri boshqarilgan taqdirda, u mamlakat iqtisodiyotiga jiddiy xavf tug'dirishi ham mumkin. Ayniqsa, global iqtisodiy beqarorlik sharoitida davlat qarzini samarali boshqarish, uning maqbul darajasini saqlash va barqarorlikni ta'minlash davlat moliyaviy siyosatining ustuvor yo'nalishlaridan hisoblanadi. Bugungi sharoitda davlat qarzining shaffofligi, uning maqsadli ishlatilishi va qaytarilish mexanizmlarining aniq belgilanishi dolzarb masalalardan biridir. O'zbekiston Respublikasi ham iqtisodiy islohotlar jarayonida davlat kreditidan samarali foydalanish va davlat qarzini boshqarish tizimini takomillashtirishga alohida e'tibor qaratmoqda. Shu nuqtai nazardan, davlat qarzini boshqarish samaradorligini oshirish, uning mamlakat iqtisodiyoti uchun salbiy oqibatlarini kamaytirish, xususan, qarzdorlik yukini maqbul darajada ushlab turish va xalqaro moliya bozorlaridagi o'zgarishlarga moslashuvchan siyosat yuritish kabi muammolar hal etilishi lozim bo'lgan vazifalardir. Mavzuning o'rganilganlik darajasini tahlil qilganda, davlat krediti va davlat qarzi masalalariga ko'plab mahalliy va xorijiy olimlar e'tibor qaratganliklarini ko'rish mumkin. Jumladan, A.X. Alimov davlat moliyasi tizimida davlat kreditining o'rni va ahamiyatini keng yoritib bergan [1]. A.V. Vaxabov va N.Yu. Jumanazarov o'z tadqiqotlarida moliya nazariyasi va amaliyotiga bag'ishlangan ishlari doirasida davlat qarzining shakllanishi va boshqaruvi mexanizmlarini tahlil qilganlar [2]. B.B. Gadoyev davlat kreditining ijtimoiy-iqtisodiy ahamiyatiga alohida to'xtalib, uning iqtisodiy o'sishga ta'sirini o'rgangan [3]. A.K. Komilov davlat qarzini boshqarishning nazariy asoslarini chuqur tahlil qilib, uning samarali mexanizmlarini taklif qilgan [4]. N.D. Musayev davlat qarzining iqtisodiyotga ta'sirini har tomonlama o'rgangan hold ...